鎮壓者聯盟

候任特首梁振英（CY）早前被唐英年指控2003年喺行會講過最終要「以防暴隊同催淚彈對付示威者」，加上佢強硬嘅作風，唔少港人都擔心CY上台會打壓社運。

▲圖：鎮壓者聯盟

網民惡搞熱爆電影

有網民就趁《版權（修訂）條例草案》通過前，把握機會惡搞CY，將近期熱爆電影《復仇者聯盟》海報惡搞成《鎮壓者聯盟》，諷刺梁班子會喺七一將「嚴陣以待，鎮壓上場」。

話明係《鎮壓者聯盟》，主角「鐵甲奇俠」CY背後，當然有一班成員撐場啦。聲稱出任候任辦主管係「捱義氣」嘅羅范椒芬化身「鷹眼」，一哥曾偉雄就係「雷神」！

▲圖：鎮壓者聯盟

至於曾加入共青團嘅候任辦項目主任陳冉，更化身「黑寡婦」（電影係由性感女神史嘉麗祖安遜飾演o架），政務司長林瑞麟同食衛局長周一嶽分別被惡搞成「美國隊長」同「神盾局局長」；而早前捲入流浮山飯局嘅政協委員劉夢熊，就變成分量十足嘅變形俠醫。Emily再諗番電影版本嘅一眾型男美女，都唔知講乜嘢好。

查實外界都笑梁營班底唔少人曾經失意官場，如今CY上場，終於可以「敗部復活」，網民今次惡搞《復仇者聯盟》似乎又幾貼切喎。

原文: CY班子被諷「鎮壓者聯盟」

keyword: 鎮壓者聯盟

▼鎮壓者聯盟 相關影片:

Posted in: 生活綜合