大快活4蚊飯

大快活4蚊飯

大快活時光倒流40年 兩款碟頭飯賣4蚊

「一碟粟米斑腩飯幾錢？」呢條問題去年考起財政司長曾俊華，亦令市民意識到食材瘋狂漲價。連鎖快餐店大快活慶祝開業40周年，下星期起一連五日推出「4蚊飯」，以4元特價喺午市出售兩款招牌碟頭飯，包括被大學生喻為「頹飯」嘅粟米肉粒飯，即時勾起Emily嘅學生回憶，事關當年每逢「糧尾」無錢開飯，最愛就係呢種只售十元八塊嘅「頹飯」，可惜今時今日百物騰貴，呢種「窮人恩物」已經成為絕唱。

日售200至500盒

唔講唔知，大快活原來已經有40年歷史，餐廳噚日宣布，下星期一開始，一連5天輪流喺20間分店，以70年代價格出售共4000個飯盒，每盒售4元。除咗粟米肉粒飯，吉列豬扒火腿飯都係賣4元，各分店每日限售200至500盒。

發售時間就比較特別，除咗星期一係由上午11時開始，周二至周五就由早上9時開始發售。市民在店內購票後，要喺指定時間之前領取飯盒。大快活解釋呢個安排係為咗分流，避免食客喺午市時間一窩蜂湧到店內買飯，會過分擠迫喎。

另外，大快活亦將會向聖雅各福群會出售特價「4蚊飯」，未來半年會與該機構合作，以低價義賣飯盒。各位想知道出售「4蚊飯」嘅分店位置，可以到大快活網頁http://www.fairwood.com.hk查詢。

Posted in: 大快活4蚊飯