施詩然

施詩然

施詩然﹕揹個LV袋

施詩然有朝返公司，一踏入升降機，遇到公司其中三位秘書。嘩！兩位拿着LV漆皮長銀包，分別一個紫、一個紅；第三位，銀包用GUCCI，揹着的手袋仍是LV。我的心情立即跌到最冰點：中環就是這裏悶。最震撼的時刻來了：就在電梯門要關一剎，有個winter intern推開門閃進來，居然亦是背着個BV袋！整程升降機，施詩然就被堆名牌袋包圍住。原來最寒酸是我：我拿環保袋咋。

名牌袋其實本身好重，真正日做夜做的人，有精力都唔會用來掮袋，外觀上愈來愈放鬆。施詩然老闆就是長期在公司踢拖，我自己日日企喺三寸半高跟鞋上走來走去，腰痠背痛，名牌袋本身不輕，揹一個係身上面，實在唔化算。

一開頭出嚟做嘢，我仲會用些少皮手袋，後來實在太忙太累，覺得與自己鬥氣太憨居：我真係賺呢個錢、做呢份工作，仲怕人睇唔起？同你計較我都蝕時間，本人時間不知幾咁貴。

其實我唔想blame the victim。這些秘書我係覺得可憐。萬幾蚊一個月打呢種工，對各種老闆低聲下氣都已夠折墜，仲要用一萬幾蚊去買一個人人都有的手袋來「裝身」返工。大佬，去做麥當奴，公司都會免費幫你造制服呀，陰公，仲要自己掏錢買。

我明，有人話佢地係虛榮有人說是貪心，我倒覺得佢地好慘：身邊人人都咁做，群眾壓力嘛，意志力少一點都不想花心機解釋：不如就順着大家，穩穩陣陣買個LV吧。唔用腦、毋須選擇的人係最幸福。

Posted in: 施詩然