十大鹽書

周秀娜做淫審判官狂批十大鹽書

淫審處發功淨化書展，所有列為不雅物品的o靚模寫真被勒令絕迹會展。身為o靚模鼻祖的周秀娜冇出寫真兩年，立心從良的她化身淫審判官品評「十大鹽書」，不但封黃榕寫真為不雅之首，連師妹Mia（陳靜儀）都唔放過，揶揄Mia教壞細路。

▲圖：十大鹽書

7．18書展殺到，各路參加寫真戰的o靚模已磨拳擦掌，覬覦寫真女王寶座。可惜模媽Mia出「書」未捷身先死，已被淫褻物品審裁處評定為第II類物品（不雅物品），必須要「包膠」及落警告字句，列明不准發售給18歲以下人士。令其他等待淫審處結果的o靚模騰騰震，隨時未上戰場便game over。身為元祖級o靚模的娜姐已有兩年冇出寫真，當年其寫真不但玩刷牙滴雪糕，還搞噱頭出攬枕，幾乎反轉會展，可是當時卻被不少家長怒插意識不良！如今娜姐已升上神枱，立心從良，即化身淫審判官品評今年「十大鹽書」。

許穎冇美感

娜姐表示，雖然未完全睇晒所有寫真，但已心中有數，邊本踩界邊本過火都逃不出她的法眼。她認為黃榕寫真為十大鹽書之首，其餘九位依次為Phoebe（許穎）、Mia、Monna（林宜芝）、Iris（鍾采羲）、冬甩、Cammi（謝芷蕙）、小櫻、Moka（方媛）及Mei Mei（曾善美）。

▲圖：十大鹽書

黃榕寫真全裸上陣，更在公眾地方「裸景」拍攝，幾乎搞到「走陰」，娜姐不齒她說：「公眾地方咁惹蚊，我就唔會做喇，佢有咁嘅勇氣的確令人欽佩，若然係我就過唔到自己嗰關，留個美好回憶畀自己係好，但唔好影到咁核突。佢今次投奔大自然，希望佢可以撞到泰山啦，咁就唔使做囉！」Phoebe寫真同樣玩全裸，娜姐寸樣話睇過幾張後，冇膽再睇多次：「因為好重口味，睇到佢pat pat都幾好生養，但呢本係寫真，點解毫無美感可言？」

應樂而不淫

至於師妹Mia娜姐一樣照寸，認為Mia作為兩個仔女之母，不應如此大膽，娜姐說：「畀着我生過仔，一定唔會好似佢咁教壞細路。其實我都未睇晒佢本書，但個概念幾好，知佢大犧牲，但要睇番個意識囉，真係太過火喇！」對於淫審處出招，娜姐說：「講老實話，今年啲書真係幾激，真係覺得我老喇！寫真有主題係好，但要樂而不淫囉，最好做到雅俗共賞，唔係要本書好有教育意義，但應該有底線，可能有人底線比我低。」

另外，Iris今年單飛推出個人寫真，為滿足不同人的需要，拍攝前自製一份問卷給朋友和粉絲，集思廣益，了解多些男性的思想。

原文: 周秀娜做淫審判官狂批十大鹽書

keyword: 十大鹽書

Posted in: 視聽娛樂